MANILA, Philippines — Naiposte ng Creamline ang pinakamasama nilang professional record sa elimination round at natalo pa sa kanilang semifinals opener kontra sa Choco Mucho.
Kaya naman nang ma-sweep ng Cool Smashers ang Flying Titans sa 2024 PVL All-Filipino Conference Finals ay tila nabunutan ng tinik sa lalamunan si team captain Alyssa Valdez.
“It was really a difficult conference for all of us probably because we’re really trying to figure out also kung nasaan kami at this point of our lives and in our careers and as a team din kung ano pa iyong kailangan naming i-improve,” sabi ng 30-anyos na si Valdez.
Inangkin ng Creamline ang ikaapat na sunod na PVL AFC crown at pang-walo sa kabuuan.
Kumpara sa nakaraang AFC noong Disyembre na winalis nila ay naglista lamang ang Cool Smashers ng 8-3 record sa eliminasyon para umupo bilang No. 4 sa single-round semifinals.
Bigo sila sa Flying Titans sa semis opener bago nakabawi at tinalo ang Petro Gazz Angels at Chery Tiggo Crossovers para tumapos na may 2-1 baraha papasok sa kanilang ika-11 finals appearance.
“Based sa standings namin, probably this was the hardest, most challenging, and unpredictable conference for the Creamline Cool Smashers,” wika ng three-time PVL MVP.
Pinadapa ng Creamline ang Choco Mucho sa Game One, 24-26, 25-20, 25-21, 25-16, at sa Game Two 20-25, 25-20, 22-25, 25-22, 15-11, para sikwatin ang titulo.
Bumanat si Finals MVP Jema Galanza ng tig-20 points sa nasabing mga panalo ng Cool Smashers sa Flying Ttans.