Lady Chiefs nagpalakas ng tsansa sa Final 4
MANILA, Philippines — Bahagyang nanlalamig ang laro ng Arellano University kaya naman kinailangan nila ng limang sets upang payukuin ang San Sebastian College, 25-17, 26-28, 22-25, 25-23, 15-12 sa NCAA Season 99 women’s volleyball na nilaro sa Filoil EcoOil Arena kahapon.
Dahil sa panalo, nanatiling malakas ang tsansa ng Lady Chiefs na makasampa sa Final Four sa event na ipinatutupad ang double round robin eliminations.
Kinapitan ng Lady Chiefs sa opensa si Pauline de Guzman na siyang nanguna sa opensa nang itarak nito ang 21 points habang bumakas sina Marianne Padillon at skipper Dodee Batindaan ng 13 at 12 hits, ayon sa pagkakasunod upang ilista ang kanilang unang streak.
Nasa pang-apat na puwesto sa team standings ang Arellano na may 3-2 karta.
Samantala, nasolo ng three-peat-seeking College of St. Benilde Lady Blazers ang liderato matapos dungisan ang malinis na karta ng Letran Lady Knights, 25-18, 25-21, 25-19 sa ikalawang laro.
Malinis sa limang laro ang Taft-based squad habang nalasap ng Lady Knights ang unang talo sa limang salang, nalaglag sila sa No. 3 sa unahan ng Lady Blazers at Lyceum of the Philippines Lady Pirates na may 4-0 card.
- Latest