Pelicans haharap sa Thunder sa first-round playoffs
NEW ORLEANS — Bumanat si Brandon Ingram ng 24 points habang humakot si Jonas Valanciunas ng 19 points at 12 rebounds sa 105-98 pagsibak ng Pelicans sa Sacramento Kings sa isang play-in tournament elimination game.
Inangkin ng New Orleans, naglaro na wala si injured leading-scorer Zion Williamson, ang No. 8 spot sa Western Conference first-round playoffs katapat ang No. 1 seed Oklahoma City Thunder.
Nauna nang yumukod ang Pelicans kay LeBron James at sa Los Angeles Lakers, 106-110, sa agawan sa No. 7 spot.
Nagdagdag si Trey Murphy III ng 16 points habang may 13, 11 at 10 markers sina reserves Larry Nance Jr., Naji Marshall at Jose Alvarado, ayon sa pagkakasunod.
Pinamunuan ni De’Aaron Fox ang Kings sa kanyang 35 points at nagposte si Domantas Sabonis ng 23 points at 14 rebounds.
Winalis ng New Orleans ang Sacramento sa kanilang anim na duwelo ngayong season.
Sa Miami, nagtala si Tyler Herro ng 24 points, 10 rebounds at 9 assists sa 112-91 pagpapatalsik ng Heat sa Chicago Bulls para kunin ang No. 8 berth sa Eastern Conference first-round playoffs.
Nag-ambag si rookie Jaime Jaquez Jr. ng 21 points sa pagsagupa ng Miami sa No. 1 Boston Celtics sa opening round.
- Latest
