MANILA, Philippines — Pipilitin ng nagdedepensang Creamline na makawala sa isang four-way tie para patibayin ang tsansa sa semifinals berth ng 2024 Premier Volleyball League All-Filipino Conference.
Lalabanan ng Cool Smashers ang Choco Mucho Flying Titans ngayong alas-6 ng gabi matapos ang laro ng mga sibak nang Farm Fresh Foxies at Strong Group Athletics sa alas-4 ng hapon sa Smart Araneta Coliseum.
Solo ng Choco Mucho ang liderato bitbit ang 8-1 record kasunod ang Petro Gazz (7-2), Creamline (7-2), PLDT (7-2), Chery Tiggo (7-2), Cignal (5-4), Akari (4-5), Nxled (3-6), Galeries Tower (3-6), Farm Fresh (2-7), Capital1 (1-8) at SGA (0-9).
Nagmula ang Cool Smashers sa 25-22, 25-12, 25-20 panalo sa talsik nang Chameleons para makaiwas sa ikalawang dikit na kamalasan.
“I think that’s the most important thing, especially since our next games are quite interesting and exciting, so we need to see ourselves and our confidence, so iyon,” ani Alyssa Valdez.
Target naman ng Flying Titans ang pang-limang sunod na arangkada para tuluyan nang makopo ang unang semis ticket.
Umiskor ang Choco Mucho ng 25-17, 25-15, 25-15 panalo sa SGA sa huli nilang laro.
Samantala, handa si Fil-Am MJ Philips na muling isuot ang uniporme ng Gazz Angels para sa asam na semifinals spot.
“We have to talk with management and see where we’re at, whether I can play the next game or probably in the semis – if we can make it to the semis, hopefully,” ani Phillips na kasama sa isinumiteng 20-man roster ng Petro Gazz sa pagsisimula ng torneo.
Nagmula ang middle blocker sa paglalaro para sa Gwangju AI Peppers sa Korean V-League.