NBA play-in, playoffs

Eventful ang final day ng NBA regular season dahil bago ang araw na ito, iisang first-round playoffs matchup ang kasado.

Sa paghupa ng usok at alikabok ng super Sunday sa US, plantsado ang final order. Boston, New York, Milwaukee, Cleveland, Orlando, Indiana, Philadelphia, Miami, Chicago at Atlanta ang No. 1 to No. 10 sa Eastern Conference.

Sa West, tumapos sa parehong order ang Oklahoma City, Denver, Minnesota, Los Angeles Clippers, Dallas, Phoenix, New Orleans, Lakers, Sacramento at Golden State.

Siyempre, “play-in” muna ang usapan.

Sa Pinas na marami ang LeBron at Steph fans, mas interesting ang labanan sa West kung saan maghaharap ang Sacramento at Golden State sa knockout match para harapin sa isa pang KO setto ang matatalo sa salpukang New Orleans-Lakers para sa No. 7 spot.

Sa parehong step-ladder format sa East, laban ang Philadelphia at Miami para sa automatic playoff entry, samantalang magtutunggali sa win-or-go-home game ang Chicago at Atlanta.

Inagaw ni Shai Gilgeous-Alexander at ng OKC Thunder ang No. 1 seed sa West, pero marami na ikinukonsidera pa rin si Nikola Jokic at ang Denver Nuggets na top championship contender.

Kinana ng Boston Celtics ang league top honors sa regular season, tangan ang 63-18 win-loss card. Pero marami ang may alinlangan sa tibay ng kanilang dibdib sa playoffs war.

Iyon nga lamang, wala naman talagang madali sa NBA playoffs.

“Look, this is the best time of year,” ani Heat coach Erik Spoelstra. “These kind of environments, the games, the context ... you can’t expect it to be easy.”