Rain Or Shine nagpalakas ng tsansa sa playoff

MANILA, Philippines — Sinasagaan ng Rain or Shine ang Terrafirma, 116-104, para palawigin ang winning streak nito at mapalakas ang playoff contention nito sa 2024 PBA Philippine Cup kahapon sa Caloocan Sports Complex.

Ito na ang ikaapat na sunod na tagumpay ng Elasto Painters na nagsimula sa 0-4 kartada para umangat sa 4-4 sa ikalimang puwesto papasok sa huling bahagi ng single-round eliminations.

Sumandal sa balanseng atake ang Elasto Pain­ters tampok ang pitong players sa double digits sa pangunguna ng halos triple-double na 19 puntos, 7 rebounds at 8 assists sahog pa ang tig-isang steal at tapal ni Beau Belga.

Kahihiralang lang kay Belga bilang PBA Press Corps-Pilipinas Live Pla­yer of the Week matapos trangkuhan ang patuloy na winning streak ng Elasto Painters noong nakaraang linggo.

Sumuporta sa beteranong big man sina Andrei Caracut, Jhonard Clarito at Santi Santillan na may 17, 16 at 15 puntos, ayon sa pagkakasunod.

Hindi rin matawaran ang ambag nina Mark Borboran, Mac Belo at Gian Mamuyac na naglista ng 13, 11 at 10 puntos, ayon sa pagkakasunod.

Abante lang nang bahagya ang RoS, 65-61, sa halftime, pero rumatsada sa second half kung saan ito lumamang ng hanggang 16 puntos tungo sa isa namang tagumpay.

Bumandera din ng muntikang triple double na 20 puntos, 8 rebounds at 13 assists sahog pa ang 2 steals si rookie Stephen Holt pero sadsad pa rin sa 4-5 ang Dyip, na noong nakaraang linggo lang ay sinilat ang Ginebra.