Lady Falcons may pag-asa pa sa Final 4
MANILA, Philippines — May tsansa pa ang Adamson University na makapasok sa Final Four matapos nilang dagitin ang 25-17, 23-25, 20-25, 25-23, 15-13 panalo kontra sa University of the Philippines sa 2nd round eliminations ng 86th UAAP women’s volleyball tournament na nilaro sa Ninoy Aquino Stadium sa Manila kahapon.
May maliit na tsansa pa ang Lady Falcons kailangan lang nilang ipanalo ang natitirang laro at matalo ang nalalabing laban ng nasa No. 4 na Far Eastern University Lady Tamaraws upang makahirit ng playoffs.
Ipinakita ni libero Karen Verdeflor ang kanyang husay sa depensa upang akbayan ang Lady Falcons sa panalo.
Nahirang na Best Player of the Game si Verdeflor matapos irehistro ang 25 excellent digs at 15 excellent receptions para tulungan ang Lady Falcons na pagandahin ang kanilang karta at umasang makasampa pa sa susunod na phase.
Tangan ang 3-8 karta, kasalo ng Adamson sa No. 5 ang Ateneo Lady Eagles, hinahabol nila ang Lady Tams na may 6-4 card.
Samantala, pasok na sa semifinals ang league leader University of Santo Tomas (10-1), defending champions De La Salle University (9-1) at National University (9-2).
- Latest
