T-Wolves nagsolo sa West

MINNEAPOLIS — Iniskora ni Anthony Edwards ang 11 sa kanyang 29 points sa fourth quarter tampok ang isang dunk sa huling minuto para pamunuan ang Minnesota Timberwolves sa 101-86 paggupo sa Brooklyn Nets.

Naglista si Karl-Anthony Towns ng 28 points para sa Timberwolves (40-17) na sinolo ang top spot sa Western Conference.

Binanderahan ni Cam Thomas ang Nets (21-35) sa kanyang 18 points kasunod ang 15 markers ni leading scorer Mikal Bridges.

Bitbit ng Brooklyn ang 45-42 halftime lead bago lumamang ng tatlo ang Minnesota sa pagtatapos ng third period at humataw ng 31 points sa fourth quarter patungo sa panalo.

Sa New York, bumanat si Jaylen Brown ng 30 points habang nag-ambag si Kristaps Porzingis ng 22 mar­kers para banderahan ang NBA-leading Boston Celtics (45-12) sa 116-102 pagpapabagsak sa Knicks (34-23).

Ito ang pang-walong sunod na panalo ng Celtics.

Sa Detroit, kinumpleto ni Paolo Banchero ang isang three-point play sa huling 0.8 segundo para tumapos na may 15 points at tulungan ang Orlando Magic (32-25) sa 112-109 pagtakas sa Pistons (8-48).