Athletics taob sa Crossovers
MANILA, Philippines — Muling winalis ng Chery Tiggo ang kanilang kalaban para solohin ang liderato ng 2024 PVL All-Filipino Conference.
Pinabagsak ng Crossovers ang baguhang Strong Group Athletics, 25-12, 25-17, 25-19, para ilista ang 2-0 record kahapon sa Smart Araneta Coliseum.
Humataw si Mylene Paat ng 10 points mula sa siyam na attacks at isang ace para pangunahan ang Chery Tiggo sa paghuhulog sa SGA sa 0-2.
“Siyempre, past two games malaking tulong lalo na sa pagpasok ng players at decision making,” ani Paat, ang 2023 Invitational Conference MVP. “Lahat kami gusto ring maging ready. Magagamit namin ito against Choco Mucho.”
May siyam at tig-pitong marka sina EJ Laure, Cess Robles at Cza Carandang, ayon sa pagkakasunod.
Nauna nang dinomina ng tropa ni coach Kungfu Reyes ang baguhang Capital1 Solar Energy, 25-6, 25-15, 25-15, sa pagbubukas ng torneo.
Samantala, dinaig ng Cignal HD ang Akari, 21-25, 25-18, 25-12, 25-18, sa kanilang unang laro.
Pumalo si Vanie Gandler ng 19 points mula sa 17 attacks, 1 ace at 1 block para sa 1-0 record ng HD Spikers habang nag-ambag sina Ces Molina, Rose Doria at Riri Meneses ng 18, 16 at 13 markers, ayon sa pagkakasunod.
- Latest
