Fajardo bumandera sa MVP Race
MANILA, Philippines — Nakaungos sa karera ng Most Valuable Player si June Mar Fajardo ng San Miguel Beer sa pagtatapos ng 2024 Commissioner’s Cup matapos makaabot sa eligbility requirement na 70% of games played.
Kumolekta ng 40.9 statistical points (SPs) ang Beermen center tungo sa pagsikwat ng bentahe sa karera para sa posibleng pang-walong MVP na magpapalawig sa kanyang rekord.
Nakuha ito ni Fajardo sa likod ng inirehistrong 16.2 points sahog pa ang league-best na 12.0 rebounds, 2.3 blocks at 1.1 steals sa 15 laro.
Sa katunayan, hindi pa nakasali si Fajardo sa Best Player of the Conference candidates ng Commissioner’s Cup nang umabot lang sa 60% ang games played dahil sa hand injury sa elimination round.
Hindi pa siya eligible hanggang sa semifinals tampok ang siyam na salang sa 15 laro bago maabot ang 70% sa paglalaro ng 6 na games sa finals tungo sa 4-2 series win ng SMB kontra sa Magnolia.
Sumegunda kay Fajardo ang Ginebra anchor na si Christian Standhardinger na may 35.7 SPs matapos humakot ng 16.5 points, 9.9 rebounds at 5.0 assists na average.
Nasa tersera naman ang Commissioner’s Cup BPC na si CJ Perez ng SMB nang kumamada ng 16.9 points, 6.0 rebounds, 3..6 assists at 2.3 steals tungo sa 35.4 SPs.
Kinumpleto nina scoring leader Arvin Tolentino (35.1 SPs) ng NorthPort at Calvin Oftana (34.1 SPs) ng TNT Tropang Giga ang Top 5 MVP candidates papasok sa Philippine Cup.
Samantala, liyamado sa Rookie of the Year award si No. 1 overall Stephen Holt ng Terrafirma sa paglista ng 24.0 SPs sa likod ng averages na 12.2 points, 5.4 rebounds, 4.5 assists at 1.3steals.
Sumunod sa kanya sina Cade Flores (22.4 SPs) ng NorthPort at Ken Tuffin (20.1 SPs) ng Phoenix Super LPG.
- Latest