Pacquiao inirerespeto ang desisyon ng IOC

MANILA, Philippines — Aminado si eight-division world champion Manny Pacquiao na nalungkot ito sa desisyon ng International Olympic Committee (IOC) na hindi aprubahan ang paglalaro nito sa Olympic Games.

Tinanggihan ng IOC ang kahilingan ng Philippine Olympic Committee (POC) na mabigyan ng slot si Pacquiao sa Paris Olympics.

Kaya naman hindi maitago ni Pacquiao ang kalungkutan dahil isa sa pangarap nito ang masila­yan sa aksyon at magwagi ng gintong medalya sa Olympics.

Ngunit walang magagawa ang Pinoy champion kundi ang tanggapin at ires­peto ang naging desisyon ng IOC.

“While I am very saddened and disappointed, I understand and accept the age-limit rules,” ayon sa statement ni Pacquiao.

Dalawang puntos ang naging dahilan ng IOC sa desisyon nito.

Una na ang pagiging overage ng 45-anyos na si Pacquiao kumpara sa age limit na 40-anyos para sa lahat ng nais maglaro sa Olympics.

Hindi rin maaaring bigyan ng awtomatikong puwesto ang Pilipinas sa ilalim ng Universality rule dahil ibinibigay lamang ito sa mga bansang may walong atleta pababa sa nakalipas na dalawang edisyon ng Olympics.

May average na 17 atleta ang Pilipinas sa 2016 Rio Games at 2020 Tokyo Olympics kaya’t awtomatiko itong diskwalipikado sa Universality rule.