Tapales na-shock sa bilis ni Inoue
MANILA, Philippines — Aminado si dating WBA at IBF super bantamweight champion Marlon Tapales na naramdaman niya nang husto ang bangis ni undisputed world champion Naoya Inoue sa kanilang laban noong Martes ng gabi sa Tokyo, Japan.
Bigo si Tapales na makuha ang panalo matapos makalasap ng 10th round knockout loss sa WBC at WBO titlist na si Inoue upang maagaw ng Japanese pug ang kanyang mga WBA at IBF belts.
Inihayag ni Tapales na nagulantang siya sa bilis at bagsik ni Inoue.
Maganda rin aniya ang naging teknik ng Japanese fighter sa buong panahon ng laban.
“I was impressed by Inoue’s technique as a boxer, and I was surprised by his speed,” ani Tapales.
Bumagsak ang rekord ni Tapales sa 37-4 tampok ang 19 KOs.
“He was very fast and I just wasn’t able to catch up with him,” dagdag pa ni Tapales.
Dahil sa panalo ay itinanghal si Inoue bilang ikalawang boksingero sa buong mundo na nakuha ang apat na world titles sa dalawang magkaibang dibisyon.
Una na itong nagawa ni American Terence Crawford.
“One year ago, I was in a similar situation after claiming all four belts. I wanted to show my appreciation to all the people who had supported my career,” ani Inoue.
Handa si Inoue na lumaban upang maipagpatuloy ang kanyang magandang karera.
“But regardless of the fact that I have these four belts, I still want to fight more great matches,” dagdag ni Inoue.
Hindi rin naging madali ang panalo kay Inoue.
Nahirapan din ito kay Tapales na itinuturing nitong isa sa mga mahuhusay na kaniyang nakalaban.
“He kept a poker face throughout and didn’t show that my punches were doing him any damage, so I was quite surprised when he went down in the tenth round,” ani Inoue.
- Latest
