HD Spikers inangkin ang bronze
MANILA, Philippines — Tuluyan nang inangkin ng Cignal ang bronze medal matapos walisin ang Chery Tiggo, 2-0, sa kanilang best-of-three series sa Premier Volleyball League All-Filipino Conference kahapon sa Smart Araneta Coliseum.
Pinatumba ng HD Spikers ang Crossovers sa Game Two, 18-25, 25-21, 25-22, 26-24, para angkinin ang kanilang ikaapat na third place finish sa pitong PVL conferences.
Nauna nang tinalo ng Cignal ang Chery Tiggo sa Game One, 25-19, 21-25, 25-15, 25-20.
“I know how hard out team work and i know how much they sacrificed,” ani Vanie Gandler na humataw ng 22 attack points para banderahan ang HD Spikers. “There’s only one thing we’re looking right now and that is the gold medal.”
Nagdagdag si Ces Molina ng 14 markers mula sa 12 attacks, 1 service ace at 1 blocks habang may 12 points si Jovs Gonzaga.
“Siyempre, very challenging ito sa amin. Everybody stepped up and everybody played well. Hindi pa rin kami titigil hanggang hindi kami nakakarating sa finals,” ani Molina.
Ang hataw ni Gandler ang nagbigay sa tropa ni coach Shaq delos Santos ng 25-24 abante sa fourth set kasunod ang sumobrang hataw ni Eya Laure sa panig ng Crossovers.
Halos 20 minuto bago nagdesisyon ang mga opisyales para sa unsuccessful challenge (foot fault) ng Chery Tiggo na nagbigay ng panalo sa Cignal, 26-24.
Bumida si Chin Basas sa second para makatabla ang HD Spikers habang nagtuwang sina Gandler at Gonzaga sa third frame para angkinin ang 2-1 bentahe sa laro.
- Latest
