Benilde-letran sa NCAA finals

MANILA, Philippines — Kinailangan ng College of Saint Benilde na magbanat ng buto upang pigilan ang San Beda University, 62-61, para masungkit ang silya sa finals ng NCAA Season 98 men’s basketball tournament kahapon sa The Arena sa San Juan City.

Nanguna para sa Bla­zers sina Miguel Oczon at James Pasturan na bumanat ng husto upang buhatin ang kanilang tropa sa unang finals appearance sa loob ng dalawang dekada.

“I’m just so thankful right now. We had some luck down the stretch but I guess that’s basketball. San Beda played a great game, so much respect for Coach Yuri (Escueta) and the guys out there. That was a tough, tough game and they prepared so well,” ani Benilde head coach Charles Tiu.

Kumana si Oczon ng 17 puntos, anim na rebounds at tig-iisang assist, steal at block habang kumana naman si Pasturan ng 16 markers, apat na boards at dalawang assists.

Naramdaman din ang presensiya ni MVP candidate Will Gozum na may double-double showing na 10 puntos at 11 boards samantalang nagdagdag sina Rob Nayve at Miguel Corteza ng pinagsamang 15 markers.

Ito ang unang finals appearance ng Blazers sapul noong 2002 kung saan umabante ang Taft-based squad sa finals sa pangu­nguna ni Sunday Salvacion.

Subalit nabigo ang Benilde na makuha ang kampeonato sa naturang taon matapos matalo sa San Sebastian College-Recoletos sa finals.

Sa ikalawang laro, sinelyuhan din ng Letran ang huling puwesto sa finals nang igupo ang Lyceum, 67-58.

Magsisimula ang best-of-three finals sa Dec. 4.