Heavy Bombers ginulat ang Pirates
MANILA, Philippines — Ayaw paawat ng Jose Rizal University matapos gulantangin ang Lyceum of the Philippines University, 63-57, upang sumosyo sa No. 2 spot kahapon sa NCAA Season 98 men’s basketball tournament sa The Arena sa San Juan City.
Mainit ang palad ni Marwin Dionisio na tumipa ng 15 points at 10 rebounds para hatakin ang Heavy Bombers sa ika-limang panalo sa pitong laro.
Humataw pa sina William Sy at John Amores ng pinagsamang 18 markers para sa Jose Rizal.
Natuldukan ang winning streak ng Pirates na nahulog sa parehong 5-2 kartada.
Nagtala si JM Bravo ng 11 points at naglista sina James Barba, McLaude Guadana at Alvin Penafiel ng 9 at 7 markers, ayon sa pagkakasunod, sa panig ng Pirates.
Sa unang laro, inilampaso ng San Beda University ang Arellano University, 96-61.
Bida sina JB Bahio at James Kwekuteye na umiskor ng tig-13 points upang pamunuan ang Red Lions sa pang-limang panalo sa pitong laro.
Magandang resbak ito para sa San Beda na nagmula sa 80-83 kabiguan sa Jose Rizal Heavy Bombers.
“I can say naging overconfident tapos we didn’t respect our opponent,” ani rookie head coach Yuri Escueta.
- Latest
