Meralco hari sa Leg 3 ng PBA 3x3 meet

MANILA, Philippines — Ginamit ng Meralco ang kanilang eksperyensa para talunin ang rookie team na J&T Express, 19-14, at pagharian ang Leg 3 ng PBA 3x3 First Confe­rence Season 2 kahapon sa Robinson’s Place sa Las Piñas.

Ibinulsa nina Alfred Batino, Leo De Vera, Reymar Caduyac at Tonino Gonzaga ng Bolts ang prem­yong P100,000.

Nakuntento naman sina Robin Rono, Robert Datu, Joseph Sedurifa at Jeric Teng ng Express sa P50,000 bilang runner-up.

Isang 7-1 atake ang ini­­lunsad nina Batino at De Vera para ibigay sa Meralco ang 15-10 bentahe na hindi na nahabol ng J&T.

 Samantala, inangkin ng Braves ang third place at premyong P30,000 matapos talunin ang Tropang Giga, 21-13.