Yulo naka-gold sa All Japan Seniors and Masters Championships

MANILA, Philippines — Isang gold medal kaagad ang kinuha ni national gymnast Carlos Edriel Yulo dalawang buwan matapos sumabak sa Tokyo Olympic Games.

Pinagharian ng 21-anyos na si Yulo ang men’s floor exercise event sa kanyang nahakot na 15.30 points sa 2021 All Japan Senior and Masters Gymnastics Championship sa Sakata City National Athletic Meet Memorial Gymnasium.

Bukod sa gold sa floor exercise event ay kumuha rin si Yulo ng bronze medal sa vault sa iskor na 15.00 points.

Ikinatuwa ni Japanese coach Munehiro Kugimiya ang nasabing performance ng 2019 Southeast Asian Games gold medalist na nabigong makapag-uwi ng medalya noong nakaraang Tokyo Olympics.

Sa Tokyo Games ay nabigo si Yulo na makapasok sa finals ng floor exercise, ngunit tumapos siyang pang-fourth sa vault competition.

Isa ang national gymnast sa inasahang kokolekta ng medalya sa nasabing quadrennial event bilang gold medalist noong 2019 World Championships sa Stuttgart, Germany.

Matapos ang Tokyo Olympics ay nanatili si Yulo sa Japan kung saan siya kasalukuyang nag-aaral kasabay ng pag-eensayo sa ilalim ng gabay ni Kugimiya.

Ang nasabing All Japan Senior and Masters tournament ay paghahanda ni Yulo sa paglahok niya sa 50th FIG Artistic Gymnastics World Championship sa Oktubre 18-24 sa Kitakysuhu, Japan.