PSC wala pang OIC
MANILA, Philippines — Suportado ng mga Commissioners ang pansamantalang pagbabakasyon ni Philippine Sports Commission (PSC) chairman William “Butch” Ramirez para personal na alagaan ang kanyang asawa.
Sinabi kahapon ni PSC Commissioner Charles Raymond Maxey na hihintayin na lamang nila kung sino ang iluluklok ng Malacañang para umaktong Officer-in-Charge (OIC) habang nasa bakasyon si Ramirez.
“We are still awaiting for Malacanang to designate an OIC,” wika ni Maxey.
Noong nakaraang linggo ay sumulat si Ramirez kay Pangulong Rodrigo Duterte sa pamamagitan ni Executive Secretary Salvador Medialdea para magsumite ng sick leave.
Ito ay para alagaan ang kanyang asawang si Mercy na sumailalim sa isang gall bladder bile duct operation.
Babalik sa trabaho ang PSC chief sa Hulyo 20.
Ayon kay Ramirez, ang Malacañang na ang pipili kung sino kina PSC Commissioner Ramon Fernandez, Arnold Agustin, Celia Kiram at Maxey ang gagawing OIC.
Tiniyak ni Maxey na patuloy ang pagmo-monitor ng sports agency sa mga national athletes na pansamantala nilang pinauwi sa kanilang mga probinsya matapos ilagay sa Enhanced Community Quarantine (ECQ) ang Metro Manila dahil sa coronavirus disease (COVID-19) pandemic.
“I am availing of this sick leave because I have to attend to the medical needs of my wife. She is in dire need of my personal care and full attention,” wika ni Ramirez sa kanyang liham. “In the meantime, may I respectfully request for the designation of an OIC, from among the commissioners of the PSC, who will manage the day-to-day operations during my leave of absence and in order not to disrupt the ope-ration of the PSC,” ani Ramirez.
Bagama’t may coronavirus disease (COVID-19) pandemic ay hindi naman natigil ang operasyon ng sports commission.
- Latest
