Thirdy Ravena Collegiate PC Player of the Year

MANILA, Philippines — Igagawad kay Ateneo de Manila University ace Thirdy Ravena ang Collegiate Player of the Year award sa 2019 Chooks-To-Go Collegiate Press Corps Awards Night na idaraos ngayong gabi sa Amelie Hotel sa Ermita, Manila.

Kikilalanin si Ravena matapos tulungan ang Blue Eagles na makuha ang ikalawang sunod na UAAP title.

Makakasama ni Ra-vena sa listahan ng mga binigyan ng naturang parangal sa nakalipas na edisyon ang kaniyang kapatid na si Kiefer at sina Mac Belo ng Far Eastern University, Jeron Teng ng De La Salle University, Robert Bolick ng San Beda University at Ben Mbala ng La Salle.

Nagtala si Ravena ng averages na 29.5 points, walong rebounds at 7.5 assists sa championship series para pamunuan ang Blue Eagles na payukuin ang University of the Philippines.

Pamumunuan naman ni Ravena ang All-Collegiate team kasama sina Bolick, Prince Eze ng University of Perpetual Help at sina University of the Philippines standouts Bright Akhuetie at Paul Desiderio.

Sina Tab Baldwin ng Ateneo (UAAP Coach of the Year) at Boyet Fernandez ng San Beda ang mga coaches of the year.

Sa unang pagkakataon, bibigyan ng grupo ng Volleyball Players of the Year standout performers sa UAAP at NCAA.

Nangunguna na si Sisi Rondina ng University of Santo Tomas bilang UAAP Volleyball Player of the Year na tinulungan ang Golden Tigresses na makabalik sa Finals.

Makakasama ni Rondina si Regine Arocha ng Arellano University bilang NCAA Volleyball Player of the Year makaraang banderahan ang Lady Chiefs sa isa na namang kampeonato.