Mga programa ng PSC tinutukan ni Ramirez
MANILA, Philippines — Sa pamumuno ni chairman William “Butch” Ramirez ay tinutukan ng kanyang administrasyon ang grassroots development program, elite sports, sports for all program, women in sports at Philippine Sports Institute sa taong 2018.
Inumpisahan ng PSC ang 2018 sa pamamagitan ng pagdaraos sa consultative meetings sa mga sports coordinators at coaches education para sa buong Mindanao na ginanap sa Digos City at Panabo City.
Isinagawa rin ang parehong coordination meetings sa local government units sa T’boli at South Cotabato.
Kasunod nito, mahigit 52 national sports associations (NSAs) ang dumalo sa coordination meeting na ginanap sa Philsports Complex sa Pasig City kung saan ipinahayag ng PSC ang mahigit P600 million budget para sa mga NSAs sa taong 2018.
Ipinagpatuloy din ng PSC ang Children’s Games at Indigenous People’s Games sa iba’t ibang bahagi ng bansa kabilang na sa Benguet, Mountain Province at Ifugao. Pinalawak din ang Play and Learn: Sports for Free mula Maynila hanggang San Carlos City, Negros Occidental, Dumaguete City at Sipalay City at ibang siyudad sa Mindanao.
Isinagawa rin ang PSC-Pacquiao Amateur Boxing Cup sa iba’t ibang rehiyon ng bansa para sa pagdiskubre sa mga bagong talento na susunod sa yapak ni boxing icon Sen. Manny Pacquiao.
Ang national championships ay ginanap sa Mandaue City, Cebu noong Sept. 7-11 kung saan nakuha ng Cagayan de Oro City ang pitong gold, tatlong silver at isang bronze medal.
Naglaan din ng mahigit P74 milyon ang PSC para sa gastusin ng mahigit 272 athletes at 63 officials sa 18th Asian Games sa nakaraang Agosto 18 hanggang Sept. 2 sa Jakarta at Palembang, Indonesia.
Sa mahigit 31 sports disciplines na sinalihan ng Team Philippines, nag-uwi sila ng kabuuang apat na gintong medalya, dalawang silvers at 15 bronzes para tumapos sa 19th puwesto at lampasan ang 1-3-11 haul sa 2014 sa Incheon, South Korea.
“We went into the Asian Games just hoping to equal our 2014 performance. Now, we have surpassed our goal. The PSC does not claim solo credit for this. This is a combined effort of all parties involved in ensuring that our athletes present their best form in the competitions,” sabi ni Ramirez.
Ang iba pang ginastusan ng PSC ay ang 7-man Team Philippines sa 2018 Youth Olympic Games sa Buenos Aires, Argentina noong Oct. 6-18 kung saan nag-uwi si Christian Tio ng silver medal sa men’s kite boarding IKA Twin Tip racing event na ang unang opisyal na medalya ng bansa sa quadrennial youth Olympic event para sa mga batang atleta mula 15-18 anyos dahil hindi naman kinonsidera ng POC ang gintong napanalunan ni archer Luis Gabriel Moreno kasama ang Chinese partner sa 2014 Youth Olympiad sa Nanjing, China.
Mahigit 92 local government units (LGUs) ang sumabak sa inorganisa ng PSC na 2018 Philippine National Games sa Cebu City noong Mayo 19-25.
Si Pangulong Rodrigo R. Duterte mismo ang nagbukas sa isang linggong kumpetisyon kung saan umani ang host Cebu City ng 52-59-71 gold-silver-bronze tally para angkinin ang overall title at P10 million cash assistance sa kanilang sports program mula sa PSC at kay Pangulong Duterte.
Kahit nanalasa ang ‘Bagyong Ompong’, itinuloy pa rin ng host Baguio City-Benguet Province at organizer PSC ang 2018 Batang Pinoy National Finals noong Sept. 15-21 sa Baguio Athletic Bowl.
Ang mga batang atleta na nagwawagi sa isinagawang regional qualifying meets sa Visayas(Dumaguete City), sa Luzon (Vigan, Ilocos Sur) at sa Mindanao elimination (Oroquita City) ay nagpasiklab sa multi-event meet para sa may edad 15-anyos pababa.
Sa ikalawang sunod na pagkakataon, dinomina rin ng host Baguio City ang kumpetisyon sa kanilang kabuuang 83 golds, 81 silvers at 107 bronzes para makatanggap ng mahigit P3 milyong halaga ng sports equipments mula sa PSC.
“The friendship and life skills that you, our children, learned on these sports competitions are ways which we hope would fortify your good character and solid bearing in life. We hope that more than the medals, more than the winning, it is the experience of being a Batang Pinoy athlete which will leave a lasting impact on your life,” ang mensahe ni Ramirez para sa mga kalahok.
- Latest
