PSC suportado si Alex Eala
MANILA, Philippines — Ibubuhos ng Philippine Sports Commission (PSC) ang buong suporta nito kay Alex Eala na magtatangkang masungkit ang gintong medalya sa 2026 Asian Games na gaganapin sa Nagoya, Japan.
Nakaamba ang penalty kay Eala sa oras na sumabak ito sa Asian Games.
Ito ay dahil hindi ito maglalaro si Eala sa mandatory event ng WTA na Beijing Open na tatama sa parehong petsa ng Asian Games.
Dahil dito, mapapatawan si Eala ng multa at ilang pang penalty.
Kaya naman handa si PSC chairman Patrick “Pato” Gregorio na suportahan si Eala anuman ang desisyon nito.
Nakikipag-ugnayan na si Gregorio kina POC president Bambol Tolentino at Philta secretary general John Rey Tiangco.
“The PSC is in close coordination and communication with POC President Bambol Tolentino and PHILTA Secretary General Mayor John Rey Tiangco. They have informed me that the official request has already been submitted to the WTA,” ani Gregorio.
Sumulat na ang Philta sa WTA para bigyan ng exemption si Eala lalo pa’t maglalaro naman ito para sa national team.
“Rest assured of the PSC’s all-out support. We will continue to assist Alex, PHILTA, and the POC in every way we can,” ani Gregorio.
Wala pang desisyon ang WTA sa request ng Philta.
Ngunit nauna nang na-deny ang kahilingan ni Janice Tjen ng Indonesia na may parehong status na gaya nang kay Eala.
Saludo ang PSC sa desisyon ni Eala na unahin ang national team sa halip na maglaro sa Beijing Open na isang WTA 1000 event.
“This is for the country. This is clear in Alex’s mind and heart. That is why we admire and support her 100 percent. Alex is the epitome of a world-class Filipino athlete—she is someone we should all emulate. She always fights for the country,” ani Gregorio.
Dumating na sa Maynila si Eala para makapagpahinga ng ilang araw bago sumabak sa Singapore Open.
Matapos ang Singapore Open, agad na tutulak si Eala sa Nagoya para sa Asian Games.
- Latest
