Cavs hahamunin ang Celtics sa East semis

CLEVELAND — Bumangon ang Cavaliers mula sa isang 18-point second-quarter deficit para resbakan ang Orlando Magic, 106-94, sa Game Seven patungo sa Eastern Conference semifinal round.

Nagpasabog si Donovan Mitchell ng 39 points para sa 4-3 pagpapatalsik ng Cleveland sa Orlando sa kanilang first-round playoff series at sagupain ang Boston Celtics sa semifinals.

Nagdagdag si Caris LeVert ng 15 markers habang humakot si Evan Mobley ng 16 rebounds para sa Cavs.

Si Mobley ang sumalo sa naiwang trabaho ni starting center Jarrett Allen na hindi naglaro sa ikatlong sunod na pagkakataon dahil sa bruised ribs.

“We didn’t come in just to win the first round. We accomplished one goal, now we have to do it again. That’s the mindset,”  wika ni Mitchell na nauna nang humataw ng 50 points sa kanilang kabiguan sa Magic sa Game Six.

Kumolekta si Paolo Banchero ng 38 points at 16 rebounds sa panig ng Orlando habang nagtala sina Franz Wagner at Jalen Suggs ng pinagsamang 3-of-28 field goal shooting.

Matapos iposte ng Magic ang 53-43 kalamangan sa halftime ay umarangkada ang Cavaliers sa second half para agawin ang 85-77 bentahe sa fourth quarter.