Flyboys 2008, Reapers 2013 nanghawod sa "Last Dance"

CEBU, Philippines — Ang 2008 Flyboys ug ang 2013 Reapers naghari sa tagsa-tagsa nila ka dibisyon sa University of San Carlos-North Alumni Basketball Club (USC-NABC) “Last Dance”:Cong. Bingo “Bagtik” Matugas Cup niadtong weekend didto sa USC-North Campus gym.

Si Rabbi Lequigan mitagak og 25 puntos samtang sila si Mico Santos ug John Reserva nagkumboya'g 21 puntos sa dihang gipatikangkang sa Batch 2008 ang 2006 Fury, 84-77, aron paglugwa nga kampiyon sa Division 3.

Dominante gikan sa sinugdanan, ang Flyboys misutoy ngadto sa 20 puntos nga labaw, 65-45, human sa tulo ka kuwarter dayon nga ngadto sa pagpatikyaob sa Fury.

Si Giovanni Padillo mipabuto og 34 puntos apan nakawang ang iyang paningkamot sa kampo sa Batch 2006.

Sa laing bahin, si King Osabel mipatuasik og 37 puntos sa dihang gilampornas sa 2013 Reapers ang 2011 Shark, 80-66, aron sakmiton ang korona sa Division 4.

Si Osabel nakakuha og dakong suporta gikan ni Dolan Adlawan nga mihipos og 20 puntos ug ni Jude Bulan nga mitali og 11 puntos alang sa Batch 2013, nga wala na molingi pa sukad mi-arangkada ngadto sa sayong 25-12 nga bentaha.

Ang Batch 2011 nakasikit sa iskor nga 32-41 sa halftime apan ang Batch 2013 milusad og laing bagsik nga ataki, 23-11, aron kontrolahon ang duwa sa hingpit  uban ang 64-43 nga bentaha padung sa pinal nga kuwarter.