Davis mi-agak sa Lakers vs Bucks sud sa 2OT

CEBU, Philippines — Si Anthony Davis nangu sa usa ka makapakurat nga pag-eskapo sa dihang ang Los Angeles Lakers mibangon human malubong og 19 puntos sa katapusang kuwarter aron bihagon ang Milwaukee Bucks, 128-124, sud sa duha ka overtime sa NBA kagahapon didto sa Fiserv Forum didto sa Milwaukee, Wisconsin.

Tungod kay wala makaduwa si LeBron James gumikan sa injury, si Davis maoy nasang-onan sa dakong responsibilidad paggiya sa Lakers ug tuod man nagbunga ang iyang kaago sud sa 52 ka minutos niyang pagbabad sa korte.

Si Davis miharos og 34 puntos, 23 ka rebounds, duha ka assists ug upat ka blocks sa impresibo kaayong salida alang sa Lakers.

Nakakuha hinoon siya og dakong suporta gikan nilang Austin Reaves ug D'Angelo Russell nga parehong mitali og 29 puntos.

Si Reaves midugang og 14 ka rebounds ug 10 ka assists sa ikaduha pa lamang nga triple-double sa iyang karera.

Dako unta kaayo og labaw ang Bucks apan hinay-hinay kining gikitkit sa Lakers hangtud nga nakatabla sa iskor nga 101-101 kortesiya sa duha ka free throws ni Taurean Prince sa pinal nga 44 segundos sa regulasyon.

Sikit kaayo ang kumbati sa duha ka puwersa sa duha ka overtime apan si Reaves milansang og 3-pointer ug si D'Angelo Russell mipasud og duha ka free throws aron paghatag sa Lakers og 126-121 nga labaw sa nahibilin nga 14 segundos.

Nakasikit ang Bucks ngadto na lang sa dos puntos human sa tres ni Malik Beasley apan si Davis mitagak og duha ka free throws aron silyohan ang makutas nga daog sa Lakers, nga mipahayag sa ilang tsansa nga maka-angkon og luna sa play-in tournament bitbit ang 40-32 rekord.

Si Giannis Antetokounmpo mihipos og 29 puntos samtang si Damian Lillard mikimada og 27 puntos alang sa Bucks, nga nagpabilin sa ikaduhang puwesto sa Eastern Conference bisan og nahagsa sa 46-26.