Giannis bida sa Bucks batok sa OKC Thunder

CEBU, Philippines — Si Giannis Antetokounmpo migiya sa Milwaukee Bucks batok sa Oklahoma City Thunder sa sangka tali sa mga NBA contenders samtang si James Harden napilde sa una niyang duwa batok sa Philadelphia sukad siya gi-trade sa 76ers.

Ang mangtas nga "Greek Freak" mipaulbo og 30 puntos ug milangkat og 19 ka rebounds aron pangulohan ang Bucks ngadto sa 118-93 nga pagsungag sa bisita nilang Thunder.

Nagparamdam sab si Khris Middleton uban ang ikaduhang triple-double sa iyang karera. Mipupo siya og 11 puntos, 10 ka rebounds, ug 10 ka assists alang sa Bucks, nga padayong nagkupot sa ikaduhang puwesto sa Eastern Conference bitbit ang 46-25 rekord.

Ang Thunder natagak sa 49-21 apan ikaduha gihapon sa West. Ang alas sa Thunder nga si Shai Gilgeous-Alexander naposasan ngadto lamang sa 12 puntos, nga maoy ikaduhang labing gamay niyang puntos ning season.

Sa laing bahin, si Harden, nga naabot sa Los Angeles Clippers human gi-trade sa Sixers niadtong Nobiembre sa maging tuig, nahagba sa mga kamot sa kanhi niya koponan.

Sila si Tobias Harris ug Tyrese Maxey mikadlit og 24 puntos matag usa aron ituboy ang 76ers ngadto sa 121-107 nga pagpayaka ni Harden ug sa Clippers.

Si Harden mihipos lamang og 12 puntos ug walay napasud bisan usa sa gitira niyang unom ka tres. Duna hinoon siya 14 ka assists.

Sila si Kawhi Leonard ug Norman Powell parehong miposte og 20 puntos sa pilderong Clippers.

Ang 76ers nagtangag na karon og 39-32 nga baraha, usa ka duwa ang gintang nila sa Indiana Pacers alang sa ikaunom ug katapusang awtomatik nga luna sa NBA playoffs.

Ang Clippers nadakin-as sa 44-26 apan ikaupat gihapon sa West.

Didto sa Detroit, si Zion Williamson miharos og 36 puntos samtang si C.J. McCollum miamot og 23 puntos sa dihang gituhak sa New Orleans Pelicans and Pistons, 114-101.

Sa Minnesota, si Anthony Edwards mi-iskor og 23 puntos apil na ang tulo ka free throws sa pinal nga 12 segundos atol tuldokan ang 114-110 nga kadaogan sa Timberwolves batok sa Golden State Warrior.

Didto sa Los Angeles, si Anthony Davis mipatuasik og 36 puntos ug 16 ka rebounds samtang si LeBron James midugang og 26 puntos ug 10 ka assists sa dihang gibugha sa Lakers ang Pacers,150-145.

Dako sab og naambag sila si Spencer Dinwiddie ug Austin Reaves nga nagkumboya'g 51 puntos alang sa Lakers. (BANAT NEWS)