Cebu Provincial Meet: Mga boksidor sa Consolacion mipakyaw og 5 ka golds

CEBU, Philippines — Ang tanang lima ka boksidor sa Consolacion nga nakasud sa finals milangkat og gold medals sa bag-ohay pang natapos nga Cebu Provincial Meet 2024 didto sa dakbayan sa Naga, habagatang bahin sa Sugbo.

Ang managsoong Jerald ug James Ryan Villarubi maoy nangu sa nagdilaab nga kampanya sa Consolacion human sila milugwa nga kampiyon sa Junior light flyweight ug Junior flyweight categories. Si Gian Castro nakamina og bulawan sa Junior pinweight class, samtang sila si John Tantiado ug Rodolfo Medalla mitunol sa laing duha ka golds sa Youth flyweight ug Youth bantamweight division.

Tungod niini, naka-angkon sila og katungod nga morepresenta sa Cebu Province sa umaabot nga Central Visayas Regional Athletic Association (CVIRAA) Meet nga ipahigayon karong Mayo sa dakbayan sa Sugbo.

Ubos sa paggiya nilang coaches Mariz Pestañas ug Gerbie Judaya, silang tanan mga produkto sa malampusong grassroots program sa Sarok Boxing Gym sa Consolacion.

Ang ilang head trainer mao si Olipio Balunan, nga amahan sa way pildeng World Boxing Organization (WBO) Asia Pacific Youth minimumweight champion Christian Balunan (10-0, 6KOs).