Macado Andam mopas-an sa labing lisud nga tahas

Mangu sa makasaysayanong double championship card sa ARQ

CEBU, Philippines — Si Ramil "The Sharp" Macado, Jr. (8-0, 4KOs) sa ARQ Stable andam mopas-an sa labing bug-at nga misyon sa iyang karera sa dihang makigsinukliay siya og kumo ni Philippine Boxing Federation (PBF) flyweight champion Lawrence "Shotgun" Dumam-ag (9-0-1, 6KOs) sa El Tigre Gym sa Mandaluyong City sa kulbahinam nga sangka tali sa way pildeng mga flyweight contenders sa seguradong eksplosibong “Engkwentro 13" fight card sa ARQ Sports Promotions karong Mayo 1 didto sa Mandaue City Cultural and Sports Complex.

Sila si ARQ Sports director Chelito Caro, press relations officer Roger Justine Potot, ug head trainer Eldo Cortes maoy nangu sa pormal nga paglusad sa labing dako nga pasundayag sa ARQ nga naglangkob og duha ka World Boxing Organization (WBO) regional title bouts kagahapon didto sa Fairfield by Marriott sa dakbayan sa Mandaue.

Uban kanila ang mga konsehal sa Mandaue nga sila si Marie Immaline Cortes-Zafra, Jimmy Lumapas, ug Oscar del Castillo, SK Federation President Fleuritz Gayle Jumao-as, ug Olympian Mary Joy Tabal-Jimenez, ang officer-in-charge sa Mandaue Athletics and Sports Development Office.   

"This is the first time we have a double championship, so I can say that this is our biggest card to date," matud pa ni Potot.

Sa main event, ang 28-anyos nga si Macado mosakbang ni Dumam-ag sa gikatakdang 12 ka hugna nga rambol alang sa WBO Oriental 112-pound belt.

Kanhi four-time national champion isip amateur, si Macado maharos og walo ka sagunson nga daog isip pro uban ang 4KOs sukad siya misud sa ARQ niadtong Marso 2022. Mapasalamton kaayo siya ning oportunidad nga mitugdon sa ilang mga palad.

"Thankful kaayo ko nahatagan ko og ing-ani nga break especially sa among boss, si sir Jason Arquisola," dason pa ni Macado. "Kani nga fight kay special ni para nako. Dili man sad matawag nga pressure gyud ni para nako, basta ako ipakita unsa among gi-training ug buhaton nako tanan para modaog ani nga fight."

Si Macado, nga mipatikangkang ni Mike Kinaadman sud lamang sa duha ka hugna sa miagi niyang away niadtong Oktubre 2023 didto sa Tuburan, angayan hinoon nga magmatngon kay dili basta-basta ug usa ka makuyaw nga kontra si Dumam-ag.

Wa tatsa sa 10 ka away uban ang usa ka tabla ug 6KOs, ang 25-anyos nga si Dumam-ag gikan sa Zamboanga del Norte mipakita og igong katakos sa miagi niyang pagkatkat sa ring. Nakasugakod siya human matumba duha ka higayon sa ikatulong hugna dayon na ngadto sa pagpalukapa ni Anthony Gilbuela sa ikasiyam nga hugna aron sakmiton ang PBF title niadtong Disiembre 15 sa miaging tuig didto sa General Santos City.

Apan ang garbo sa Marbel, South Cotabato nagkanayon nga andam siyang atubangon unsa man gani ang ibuga ni Dumam-ag kaniya.

"Dili gyud ta mokompiyansa kay sa background niya sa amateur, taas pud iyahang record. Mas nakauna pud siya sa professional ug beterano sad. Gamiton lang namo ang unsay natun-an namo sa training. Kumpyansa ko nga modaog gyud ko ani kay taas-taas among preparasyon ug amo ni gipangandaman og maayo," dugang pa ni Macado.

Sa co-main event, si kanhi two-time world champion Vic "Vicious" Saludar (24-6, 14KOs) makigharong ni Sanchai Yotboon (14-7, 9KOs) sa Thailand alang sa WBO Oriental minimumweight title.

Laing duha ka mga batos sa ARQ ang mopakita sab og aksiyon. Si Ian Abne makigtige ni Darwin Bayones sa Laguna, samtang si Reil Gabunilas makighamag ni Ronald Ewikan sa Misamis Oriental. Sa espesyal nga atraksiyon diin magbangga ang duha ka mga babayeng boksidor, ang Amerikanang si Casey Croft gikan sa California makigbinukbukay ni Thai Peeyalulax Sanpokang sud sa unom ka hugna nga kumbati ubos sa junior bantamweight class.