Cansaga Fiesta League: Purok 1 Cansika, All Cousins gisubha'g daog
CEBU, Philippines — Gisugat og daog ang Purok 1 Cansika ug All Cousins pagsugod sa Cansaga Fiesta Basketball League 2024 didto sa Consolacion, Cebu.
Si Fil-Am Bio mibubo og 25 puntos, pito ka rebounds ug upat ka assists samtang si Jomer Sumaya midugang og 19 puntos sa dihang gilampaso sa Purok 1 Cansika ang Purok 4, 89-69, sa Senior B category.
Wala na molingi pa ang Cansika sukad misutoy ngadto sa 49-29 nga labaw sa halftime.
Sa laing bahin, si Keven Manatad mipupo og 22 puntos, walo ka rebounds ug lima ka assists, samtang si Zneb Jefferson Bustos ug Abner Cortes nagkumboya'g 28 puntos aron pangulohan ang All Cousins ngadto sa 81-73 nga pagpayaka sa Purok 8 sa Senior A division. Sa ubang resulta, sila si Mark Yaun, Adrian Bagnas ug Jhon Anthony nagkumboya'g 46 puntos sa dihang gidemolis sa Purok 7 ang Purok 3, 88-54, sa SK category, samtang si James Tribucio mipabuto og 27 puntos sa dihang gilampornas sa Purok 5B ang Purok 8, 86-64, sa Senior B. Si Tribucio nakakuha og dakong suporta gikan ni Camlon Maglasang ug Joel Alivio nga nagkumbinar og 25 puntos. Sa Senior A, sila si JR Tabigue, Bodoy Ermac ug Nikko Chavez nakatigum og 31 puntos aron ituboy ang Purok 3 ngadto sa 61-50 nga pagpakaging sa Purok 4.
Sa laing bahin, si Lavenia Gersale sa Team Quatres maoy mibira sa Best Muse award, ang Purok Tres gibayaw nga Best in Uniform, samtang ang Purok 6 gihukman nga labing organisadong team.
Sa exhibition match nga milamas sa adlaw sa pagbukas, ang University of San Carlos (USC) Warriors miwani sa Cebu Roosevelt Memorial Colleges (CRMC) Mustangs, 79-68.
- Latest
