2nd Mayor Cabaron inter-town sportsfest mo-arangkada na

CEBU, Philippines — Ang 2nd Mayor Inocentes Cabaron Invitational Inter-Town Basketball and Volleyball Tournament  mosikad na karong adlawa didto sa Moalboal Sports Complex sa lungsod sa Moalboal habagatang bahin sa Sugbo.

Sa basketball nga nagtanyag og P500,000 nga ganti sa mga mananaog, usa ka dosenang teams nga gibahin sa duha ka grupo ang mag-ilog sa korona ning duha ka bulan nga torneyo nga gituyo aron pagdugang og lamas sa tinuig nga pista sa Moalboal agi'g pangilin sa minahal nilang patron nga si San Juan Nepomuceno karong Mayo 19.

Ang Argao, Aloguinsan, Malabuyoc, Badian, Dumanjug, ug Ronda nasakop sa Group A, samtang ang  Sibonga, Samboan, Barili, Dalaguete, Boljoon,  ug Alcantara magtige sa  Group B.

Ang Ronda makigharong sa Badian sa pasiunang duwa sa alas 6:45 sa gabii samtang ang Barili mosakbang sa Samboan sa main game sa alas 8:45 sa gabii.

Unya sa Dominggo, ablihan sa Malauyoc ang ilang kampanya batok sa Badian sa pasiunang duwa, sa dili pa ang Sibonga makigharong sa Boljoon.

Ang makampiyon mobulsa og P200,000, samtang ang mopahiluna sa ikaduha ngadto sa ikaupat nga dapit mokubra og P150,000, P100,000 ug P50,000.

Sa laing bahin, ang volleyball event dunay duha ka dibisyon,  men s ug women s.

Ang mga pambato sa Moalboal ni coach Dave Cabaron makigsangka batok sa mga koponan gikan sa Barili, Dumanjug, Ronda, Alcantara, Badian, Malabuyoc, ug Alegria.

Ang makampiyon matag dibisyon makadawat og P50,000, samtang ang malandig sa ikaduha ngadto sa ikatulo nga puwesto mokabi og P30,000, P20,000 ug P10,000.