2nd Mayor Romeo Bike Fest
CEBU, Philippines — Dekalibreng mga seklista sa Sugbo manulong sa Madridejos.
Usa ka panon sa mga tang-an nga Sugbuanong seklista ang mopakita na sab sa ilang abilidad sa 2nd Mayor Romeo Villaceran Bike Fest 2023, usa ka road race ug mountain bike challenge nga gikatakda karong Dominggo, Disiembre 3, didto sa lungsod sa Madridejos, isla sa Bantayan.
Si Junreck Carcueva, usa ka professional road racing cyclist ubos sa 7 Eleven Cliqq-Air21, maoy nangu sa listahan sa dekalibreng mga entrante diin siya modepensa sa duha niya ka mga titutlo sa road bike ug MTB Open category, matud pa ni event chairman Jynhel Negre.
"Volunteerism ra gyud kay amo ning gibuhat para sa lungsod ug ni Mama Mary," matud pa ni Negre. Ang ubang lig-on nga mga entrante nga angay lantawon sa tagsa-tagsa nila ka mga kategoriya mao sila si Jonel Carcueva, Zack Reyes, Donkey Sanchez, Khalil Sanchez, Keith De Fiebre, Nilo Barbalose, Jim Villaceran, Martin Hubert Quiamco, Rodhoward Orbeta ug Vince Lawrence Tibay.
Sa women's division, sila si Lovely Gitaruelas ug Mae Laboca maoy mga bug-at nga paborito.
Sa laing bahin, ang mga partisipanteng koponan nga manulong sa isla naglangkob swa Team Williams, Team Indianos, Keith Defeibre Cycling, BikePort, UTP, Team Espana Cebu, Daanbantayan, JM CYCLE, IBS Catmon, ug Tira Bords Tuburan.
Mohagit kanila ang mga pambato sa isla gikan sa Madridejos Cycling Team (MACYC), Sikad de Madridejos, Bantayan Moutain Bikers, Sikad Santa Fe, ug Padyak de Isla.
Sa kinatibuk-an, ang Madridejos Cycling Team (MACYC) nga gipangulohan ni Robert Milan ug Sikad de Madridejos ubos sa liderato ni Torj Jubay mibana-bana og dili mominus 250 ka partisipante ning usa ka adlaw nga lumba nga gituyo aron pagdugang og lamas sa tinuig nga pista sa mga Lawisanon agi'g pagtamod sa minahal nilang patrona nga mao ang Inmaculada Concepcion karong Disiembre 8.
Dul-an sa P100,000 nga ganting salapi ang ipangapud-apud sa mga mananaog. Ang makampiyon sa Road Bike ug MTB Open mobulsa og P10,000. Ang mopahiluna sa ikaduha ngadto sa ikalimang dapit makadawat og P5,000, P3,000, P2,000, ug P1,500 samtang ang maapil sa top 10 dunay P500 matag usa.
- Latest
