Bogo City teams mikadlit na sab og kaluhang daog

CEBU, Philippines —  Ang mga teams gikan sa dakbayan sa Bogo, amihanang bahin sa Sugbo mirehistro na sab og kaluhang daog human ang Cebu Roosevelt Memorial Colleges (CRMC) Mustangs ug ang City of Bogo Science and Arts Academy (CBSAA) Trailblazers mipatigbabaw batok sa tagsa-tagsa nila ka mga kontra sa Cebu Schools Athletic Foundation, Inc. (CESAFI) Season 23 Men's Basketball Tournament niadtong Huybes sa gabii didto sa Cebu Coliseum.

Mikolapso ang Mustangs sa endgame apan nagsandig sa pagkamabayanihon nilang Paulo Dalumpines, Keaton Clyde Taburnal ug James Gelig aron pakagingon ang Cebu Institute of Technology-University (CIT-U) Wildcats, 78-73.

"It was a great experience being a head coach of CESAFI 2023. Naa ang kaba, kalipay ug kaguol labi na moligas but it the end nagamit namo among key: heart + mind + fun = success," buhagay pa ni assistant coach Lee Mhar Dahil nga amoy midala sa Mustangs tungod kay nag-leave man ang head coach nilang si Paul Alelu Flores.

Ang Mustangs miposte unta og komportableng 17 puntos nga bentaha, 69-52, sa  buzzer-beating 3-pointer ni Taburnal nga maoy mitak-op sa ikatulong kuwarter, apan ang Wildcats miabli sa katapusang bahin sa duwa pinaagi sa nagkayong 14-0 rally sa wala pa gi-ilog ang labaw, 72-71, sa pinal nga tres minutos.

Si Dalumpines, nga maoy mibisbis sa unom ka minutos nga huwaw sa opensa sa CRMC, mipasud og laing krusyal nga layup aron pagpa-abante og balik sa Mustangs, 73-72, sa nahibilin duha ka minutos sa kulbahinam nga aksiyon. Si Gelig miposa dayon og hagpok kaayong tres sa wala pa si Taburnal molansang sa panapos niyang nga basket nga maoy nagsilyo sa singko puntos nilang pag-eskapo.

Si Dalumpines misidlak uban ang 22 puntos, upat ka rebounds, pito ka assists, ug lima ka steals alang sa CRMC.

Miamot si Taburnal og 16 puntos, walo ka rebounds ug usa ka assists samtang si Gelig midugang og otso puntos ug lima ka rebounds sa dihang ang Mustangs mipuwersa og triple tie sa ikalimang dapit uban sa Benedicto College Cheetahs ug University of San Carlos (USC) Warriors bitbit ang managsamang 4-4 nga    baraha.

Samtang ang Mustangs nagkalisud batok sa Wildcats, ang Trailblazers yano rang mirehistro sa ikaupat nilang sagunson nga daog human gilampaso ang University of San Carlos (USC) Baby Warriors.

Si Franz Albao mipupo og 18 puntos, si Karl Dosdos mitali og 16, samtang sila si Felix Rogasajo ug Anfernny Illustrisimo miamot og 12 puntos matag usa alang sa Trailblazers nga nagtangag na karon og 4-4 rekord.

Mihimo sab og kasikas sila si Franz Aballe, Vinz Rivera, June Brian Alipato, ug Kyle Barrieta nga nagkumbinar og 32 puntos alang sa Trailblazers, nga milusad og ekslosibong sinugdanan, 34-7, nga nakapabarag sa Baby Warriors sa nahibiling bahin sa duwa.

Gitiwasan pa gani sa Trailblazers ang Baby Warriors sa sunod nga duha ka kuwarter aron paburoton ang ilang labaw ngadto na sa makalisang nga 40 puntos, 78-38.