Fury, Usyk magsinukmagay  sa Saudi Kompirmado na.

CEBU, Philippines —  Ang duha ka way pildeng mga higante nga sila si Tyson Fury ug Oleksandr Usyk magbangga ibabaw sa ring alang sa undisputed heavyweight title unya sa Pebrero 17 sunod tuig didto sa Saudi Arabia.

Si Fury maoy nagbitbit sa bakos sa WBC, samtang si Usyk tulo ka mga titulo ang gikuptan sa WBA, IBF, ug WBO.

Ang modaog sa ilang sangka koronahan nga labing unang undisputed heavyweight world champion sukad ni Lennox Lewis nga naghari gikan niadtong 1999 ngadto sa 2002. Sila si Fury ug Usyk orihinal untang gitakda nga mag-abot karong Disyembre, 23. Apan ang makapadisyama nga performance ni Fury diin siya midaog lamang pinaagi sa split decision batok ni MMA star Francis Ngannou sa miaging bulan nakapuwers sa pag-delatar sa giatngan nilang bugno ni Usyk.

Si Fury wala pay pilde sa 35 ka away uban ang usa ka tabla ug 24KOs, samtang si Usyk nagtangag sab og perpektong 21-0 rekord uban ang 14KOs.