Chris Paul buhian sa Suns

CEBU, Philippines — Ang 12-time NBA All-Star guard nga si Chris Paul buhian sa Phoenix Suns human sa tulo ka seasons sa team.

Si Paul, nga naggukod pa gihapon sa una niyang NBA title sa edad nga 38 anyos, lagmit mamahimong labing sikat nga free agent kon mahingpit na ang pag-release kaniya sa Suns.

Kini bisan pa man og mi-average lamang siya og 13.9 puntos, 8.9 assists, 4.3 rebounds ug 1.5 steals matag duwa ning season.

Sa pag-abot ni Paul sa Suns, nakasud sila sa NBA Finals niadtong 2020-21 season apan gipilde sila sa Milwaukee Bucks sud sa unom ka duwa.

Apan sa miaging duha ka seasons, kanunay silang natagak sa ikaduhang hugna sa playoffs.

Si Paul, nga kaduha nakadaog og Olympic gold medal uban sa Team USA niadtong 2008 ug 2012, unom ka higayon nga nahimong lider sa steals ug kalima sa assists sa NBA.

Mi-average siya og 17.9 puntos, 9.5 assists, 4.5 rebounds ug 2.1 steals matag duwa sud sa 18 niya ka tuig sa NBA uban sa New Orleans Hornets, Los Angeles Clippers, Houston Rockets, Oklahoma City Thunder ug Suns.

Miabot ang taho nga buhian si Paul sa Suns usa ka adlaw human gikompirma sa Phoenix management ang pag-hire ni Frank Vogel  isip bag-o nilang coach.

Si Vogel migiya sa Los Angeles Lakers ngadto sa kampiyonato niadtong 2020 bubble season.

Si Paul duna pay nahibiling duha ka tuig sa upat ka tuig niyang kontrata sa Suns nga mibalor og $120 million.