Kompleto na semis cast sa Javier Ceramics Cup

CEBU, Philippines — Midaog sa managlahing paagi ang JMD Automotive ug ang Cake and Memories nga maoy mikompleto sa semifinals cast sa Javier Ceramics Cup 2023.

Ang JMD miagi pa'g overtime una mìdaog sa sikit kaayo nga duwa batok sa Zynergia, 73-71, samtang ang Cake and Memories yanong milansang og 46-38 nga kadaogan batok JJS Electrical sa quarterfinals niadtong Domingo diha sa Ateneo de Cebu sa Mango Avenue, Cebu City.

 Nangamay na unta ang daog sa Zynergia human sila nilabaw, 67-65 sa himalatyong segundos, apan gibaraw kini ni Ariel Pepito pinaagi sa iyang buzzer-beater fastbreak play nga nakapwersa sa duwa ngadto sa overtime.

Sa dugang singko minutos, padayong nipakita sa ilang diskarte ang duha ka karibal inubanan ang hugot nga depensa.

Si Arsenio Sugcay milansang sa iyang perimeter shot jumper aron hatagan ang JMD og 73-71 nga bentaha sa nahabiling 15 segundos. Buot unta kawaton sa Zynergia ang daog, apan palpak kay nikagar ang  3-point shot ni VM Cempron dayong kapupos sa oras.

Ang best player nga si Lucky Mendoza ang topscorer sa JMD nga mipabuto'g 22 puntos uban ang lima ka rebounds ug upat ka assists. Si Pepito miamot og 13 puntos, samtang si Alain Tarona mitampo'g 10 puntos sa JMD ni Gerald Dilao.

Sila si Cempron ug Dan Cardenas miantog og 23 puntos matag usa aron mangu sa scoring sa Zynergia, samtang si Brixter Villarias mitikdol og 14 puntos ug si James Tolentino mitimang og 10 puntos.

Sa laing bahin,  si Rico Rosaroso mao lang ang nakaabot og double figures sa iyang 15 puntos nga igo na kaayo nakapadaog sa Cake and Memories ni Allan Paris Caballes. Mihimo sab siya'g unom ka rebounds ug duha ka assists aron ilhong best player of the game.

Si Lorenzo Isip miiskor og 13 puntos aron pangulohan ang JJS Electrical. Ang JJS Electrical ni Jeffrey Banaag ug Zynergia ni Alvin Taneo nanamilit na ning maong liga nga giorganisar sa Brothers Ball League.