Jokic midominar, Nuggets giunhan ang LA Lakers sa NBA West finals

CEBU, Philippines — Si Nikola Jokic mipakita og dominanteng salida sa dihang gipiog sa Denver Nuggets ang Los Angeles Lakers, 132-126, sa pasiunang duwa sa ilang best-of-seven NBA Western Conference finals kagahapon didto sa Ball Arena sa Denver, Colorado.

Ang two-time MVP nga si Jokic mitapos uban ang 34 puntos, 21 ka rebounds ug 14 ka assists aron hatagan ang Nuggets og 1-0 nga labaw sa serye, nga mapadayon didto gihapon  sa ilang korte karong Biyernes.

Nakakuha si Jokic og dakong suporta gikan ni Jamal Murray nga mipatuasik og 31 puntos samtang lain pang upat ka Nuggets ang mikadlit og  double-digit.

Si Jokic mitali og otso puntos, 12 ka rebounds, ug lima ka assists aron ituboy ang Nuggets ngadto sa 37-25 nga bentaha human sa unang kuwarter, nga ilang giinat ngadto sa 72-54 sa halftime.

Gipaburot pa sa Nuggets ang ilang labaw ngadto sa 21 puntos sa ikatulong kuwarter.

Nakuratan hinoon ang Nuggets human ang Lakers nakasikit ngadto na lamang sa tres puntos maayo na lang gani kay nakahutay sila dayon na sa pag-eskapo ngadto sa sayes puntos nga kadaogan.

"In the first half we were really good -- controlled the game, controlled everything, controlled the pace, controlled the defense and then second half we lost it," dason pa ni Jokic. "But whether you win by one point or win by 20 at this time of year, it doesn’t matter -– a win is a win."

Ang Lakers gipangulohan ni Anthony Davis bitbit ang 40 puntos ug 10 ka rebounds. Si LeBron James midugang og 26 puntos samtang si Austin Reaves mihipos og 23 puntos sa naminghoy nga LA.

"In postseason it doesn't matter if you cut it to one or you're down 20, if you lose, you lose," buhagay pa ni James. "They are 1-0 and we have to come back with desperation going into game two. We have to play better, we have to rebound better ... We need to be better in all facets of the game."