Tam-is nga kalamposan

CEBU, Philippines — Ang Gilas Pilipinas malampuson nga mibalik sa ilang trono isip hari sa basketball sa Southeast Asia.

Kini human gibaslan sa mga Pinoy ang host Cambodia, 80-69, aron langkaton ang gihandum nilang gold medal sa men's basketball event sa 32nd SEA Games niadtong Martes sa gabii didto sa Morodok Elephant Hall 2 sa Phnom Penh, Cambodia.

“I know a lot of people doubted this team after the first loss (to Cambodia). But the first words in the dugout I said after that loss was ‘this was a loss that we could afford,” matud pa ni Reyes. “I thought we needed that loss actually. So we just kept our focus and here we are.”

Si Justin Brownlee mipabuto og 23 puntos uban ang pito ka rebounds ug upat ka assists aron pangulohan ang Gilas.

Dalaygon ang gihimong pagpamawi ni Brownlee nga wala makaugpo sa una nilang engkuwentro diin ang Gilas gipilde, 79-68, sa Cambodia nga gilangkoban og unom ka naturalized players.

Ning higayona, ang Gilas wala na molingi pa sukad miposte og 44-33 nga bentaha sa halftime.

Ang Cambodia mipaduol ngadto na lang sa singko puntos, 59-64, luyo sa 8-0 run pagsugod sa katapusang kuwarter apan sila si CJ Perez ug Brownlee milansang og duha ka sagunson nga tres aron pagpaginhawa sa Gilas og lawom, 76-64.

Kontrolado na sa mga Pinoy ang duwa sukad niadto.

“The players did a hell of a job. They stuck together. We kept this (Cambodian) team of five, six Americans to under 70 points. That was great defense,” matud pa ni Gilas coach Chot Reyes. “In the end, it was our defense that got us through to the gold medal.”