Schoeman, Visser naghari sa Ironman 70.3 Lapu-Lapu
CEBU, Philippines — Taliwala sa naglagiting nga kainit sa adlaw, ang South African Olympic medalist nga si Henri Schoeman ug Els Visser sa The Netherlands mikuha og atensiyon human miluagwa nga kampiyon sa elite pro division sa Ironman 70.3 Lapu-Lapu Cebu didto sa Mactan Newtown kagahapon.
Si Schoeman, nga mibira og bronze medal niadtong 2016 Rio Olympics didto sa Brazil, maoy labing paspas sa tanang mga propsesyonal entrante. Iyang gihuman ang makutas nga lumba nga naglangkob og 1.9km swim, 90km bike, ug 21km run sud sa upat ka oras, duha ka minuto, ug 31 segundos aron sakmiton ang men's overall title.
“I honestly didn’t expect to lead the entire way," matud pa ni Schoeman.
“It’s just become a survival race and I managed to win. I’m really happy about that,” dugang pa ni Schoeman, nga nangandam sa ikatulo niyang pagkumbati sa Olympics didto sa Paris karong Hulyo.
Si Sam Osborne sa New Zealand nahimutang sa halayo nga ikaduhang puwesto sa oras nga 4:06:40, samtang ang Briton nga si Thomas Bishop mipatak og 4:11:01 aron pagpahiluna sa ikatulong dapit.
Sa iyang bahin, si Visser ang gikoronahang rayna sa women's pro sa oras nga 4:21:29.
Nagsunod kaniya si Anne Reischmann sa Germany nga dunay oras nga 4:24:39, samtang ang Hungarian nga si Zsanett Bragmayer nalandig sa ikatulong dapit sa oras nga 4:36:41.
“I gave my extra best today, that I’m really proud of," dason pa ni Visser nga sama ni Schoeman mibulsa og $5,500 nga ganti.
- Latest
