Jot Trucking mibihag na sab sa CJL Sniper sa Javier Ceramics Cup 2023
CEBU, Philippines — Buhi pa ang paglaum sa Jot Trucking nga moabante sa semifinals human ilang gibihag ang CJL Sniper, 71-58 sa Javier Ceramics Cup 2023 niadtong Domingo diha sa Ateneo de Cebu sa Mango Avenue, Cebu City.
Sa sayo pa, ang Cake and Memories nidaog pinaagi sa default batok sa JMD Automotive.
Nangu sa Jot Trucking mao ang best player nga si Romnick Romo nga mihakot og 14 puntos, lima ka assists ug tulo ka rebounds. Sila si JJ Vestra ug RJ Bautista miariya'g 10 puntos matag usa alang sa Jot Trucking ni Jeffrey Tagacanao nga duna na'y 4-2 record.
Ang CJL nga napilit sa kinailawmang bahin sa standing sa ilang 0-6 nga baraha gipangulohan sa ilang team manager James Lapinid sa iyang 12 puntos, gisundan nilang Rondirk Monterola, Ricky Adolfo, Jesrael Naraja, Nico Cojo ug Jimmy Fernan nga adunay tag 10 puntos.
Sa ikaduhang duwa, ang Zynergia mirehistro sa ilang ikatulong daog human mapaksit ang JJS Electrical, 55-48 ubos sa pagpangulo sa best player niining si Brixter Villarias nga mikamada'g 20 puntos, lima ka rebounds ug tulo ka assists.
Si Dan Cardenas mitimbre'g 13 puntos sa team ni Alvin Taneo nga nagbitbit na og 3-3 nga baraha.
Duha sab ka player sa JJS ang miiskor og double figures pinangulohan ni Randy Awit sa iyang 14 puntos, gisundan ni Jerome Pagambunan nga dunay 10 puntos.
Ang JJS Electrical ni Jeffrey Banaag duna na'y 1-5 nga baraha ning maong liga nga giorganisar sa Brothers Ball League.
- Latest
