Lakers nagmilagro batok sa Mavericks, Bucks nakasagunson og 14 na ka daog

CEBU, Philippines —  Nagmilagro ang Los Angeles Lakers human malubong og 27 puntos dayon nga ngadto sa pagpasukarap sa Dallas Mavericks, 111-108, samtang ang Milwaukee Bucks miinat sa ilang ratsada ngadto na sa 14 ka sagunson nga duwa sa NBA kagahapong adlawa.

Si Anthony Davis mipabuhagay og 30 puntos ug 15 ka rebounds alang sa Lakers nga miposte sa ikatulo nilang sagunson nga daog nga nakapabuhi sa ilang kampanya nga makatikang sa playoffs.

Midugang si LeBron James og 26 puntos samtang si Jarred Vanderbilt mihimo sab og kasikas sa Lakers uban ang 15 puntos,  17 ka rebounds ug upat ka steals.

Gawas sa impresibo niyang performance, dalaygon sab ang depensa ni Vanderbilt batok ni Mavs star Luka Doncic.

Tungod niini, si Doncic nalimitahan ngadto lamang sa 12 puntos human mibubo og 14 puntos sa unang kuwarter.

Si Kyrie Irving mi-iskor og 21 puntos uban ang 11 ka rebounds alang sa Mavs nga wala makaugpo taliwala sa nagkayong salida sa Lakers sa katapusang kuwarter.

Didto sa Milwaukee, si Jrue Holiday mipupo og 33 puntos aron tabangan ang Bucks pagpiog sa Phoenix Suns, 104-101.

Nagparamdam sab si Brook Lopez uban ang 22 puntos, apil na iyang layup nga nakapa-abante sa Bucks sa hingpit, 102-100, sa pinal nga 28.4 segundos.

Si Devin Booker maoy nangu sa pilderong Suns bitbit ang 24 puntos.

Didto sa Atlanta, si Trae Young maoy bayani sa dihang mipasud kini sa iyang buzzer-beating shot aron aswaton ang Hawks ngadto sa makutas nga daog, 129-127, batok sa Brooklyn Nets.