Malaysia Pushbike championships walo ka sugbuanong tsikiting mokumbati alang sa Team Philippines
CEBU, Philippines — Walo ka Sugbuanong mga bata, nga nag-edad og kuwatro ngadto sa sayes anyos, ang morepresenta sa Pilipinas sa M8 International Pushbike Championships 2023 nga gikatakda karong Marso 3-5 didto sa Velodrome sa Johor, Malaysia.
Kini mao sila si Rhaegar Santimari Cabahug ug Kendra Cabahug sa Looc, Mandaue City, Mavis Jayden Dumdum sa Bakilid, Mandaue City, Amber Mae Quimque sa Calawisan, Lapu-Lapu City, Cole Damian Abellar ug Mia Ysabelle Abellar sa Tisa, Cebu City, Timothy Jon Mendoza sa Pusok, Lapu-Lapu City, ug Kalon Venus Boholst Torrefranca sa Inayawan, Cebu City.
Espesyal kaayo ang ilang partisipasyon gumikan kay mao kini ang labing unang higayon nga ang nasud mosalmot sa maong internasyonal nga kompetisyon sukad kini nahimugso walo ka tuig na ang milabay.
Ubos sa paggiya sa ilang trainer nga si Keken Cabahug sa Team KC46, makigtige sila batok sa kapin usa ka gatus ka mga batang pushbikers gikan sa host Malaysia, Thailand, Indonesia, Vietnam, China, Japan, Hong Kong, ug Singapore.
- Latest
