17th Thirsty Football Cup UC kampiyon sa men's open

CEBU, Philippines — Ang University of Cebu (UC) Webmasters mipiog sa labing sikit nilang karibal nga University of San Carlos (USC) pinaagi sa penalty shootout, 3-2, aron langkaton ang men's open title sa 17th Thirsty Football Cup niadtong weekend didto sa Cebu City Sports Center.

Parehong wala maka-iskor ang duha ka koponan human sa regulasyon apan ang UC mipakita nga  mas gutom ug mas determinado sila dayon na ngadto sa pagbira korona ubos sa pagpangu ni Jim Travina nga maoy miangkon sa Golden Ball award.

Sa women's open, ang Chicos United, nga gilangkoban og mga magduduwa gikan sa Iloilo ug Cebu, maoy nanghawod human silang gibuntog ang Futboleros sa Dumaguete, 2-1. Si Danielle Daria ang gitunolan sa Golden Ball trophy.

Sa laing bahin, ang Bloodline FC miwani sa Warzhocks FC, 3-2, aron dominahon ang mixed open category samtang ang Cartets Trading mipukan sa Immortals FC sa Masbate, 1-0, aron sakmiton ang titulo sa 40-above division.

Wala hinoon maserohi ang Immortals gumikan kay sila man maoy nanghawod sa girls 17 division human mipatigabaw batok sa Dolphins kortesiya sa mas dako nilang goal difference.

Sa laing bahin, ang Don Bosco Technical College (DBTC), Cebu Elite/Sheba, ug Ilonggo United milabni og tagurha ka titulo.

Ang DBTC-A naghari sa boys 19 ug boys 17 human gilupig ang USC, 3-2, ug Golden Harvest, 3-1, ang Cebu Elite/Sheba FC nakampiyon sa boys 15 ug boys 11 human gipaluihod ang Cebu United, 6-5, ug Eagles United, 1-0, samtang ang Ilonggo United miangkon sa unang dapit sa Under 7 ug Under 9 human gibugha ang Classico de San Carlos, 3-2, ug DBTC-C, 1-0.

Ang CNN Dolphins sa Negros Oriental mipahiluna sa unang puwesto sa boys 13 human gilupig ang Crocs FC, 2-0, samtang ang Guardians Strikers gikoronahang rayna sa girls 15.