AC Troopers mitipi sa Jet Manz

CEBU, Philippines — Namansahan sa AC Troopers ang limpyong rekord sa Jet Manz team Mandaue pinaagi sa paglubong niini sa iskor nga 96-80 sa nagkainit nga aksiyon sa LABA basketball tournament niadtong Lunes sa gabii diha sa Co Tiao King gym sa Tabok, Mandaue City.

Nagpungasi  nga opensiba uban ang solidong depensa ang gihimong hinagiban sa AC Troopers aron maputol ang walo ka sagunson nga daog sa Jet Manz.

Pagsugod pa lang, piti-piti dayon ang opensa sa AC Troopers ubos sa pagtimon sa team owner niining si PCapt. Dondon Coloscos aron dominahon ang duwa ug gani wala nila hatagi’g higayon ang Jet Manz nga molabaw hangtod napupos ang gikatakdang oras sa duwa.

Wala kaayo ka-arte ang 6-foot-6 bigman sa Jet Manz nga si Noel delos Santos gumikan sa grabeng depensa nilang Coloscos, Martin Regidor, Derick Eumagi, Reyden Villaronza, Abz Sabang ug Opong Englis batok kaniya. Gawas sa depensa, sila si Regidor, Eumagi, Coloscos, Villaronza ug Sabang dako sab og natampo sa scoring sa AC Troopers ingon man silang Joel Cabahug ug Lloyd Chavez.

Pilde man tuod, apan ang Jet Manz, pabilin gihapon nahimutang sa unang dapit sa team standing uban ang 8-1 nga record.