Durant padayong nagmangtas; LeBron nayayay
CEBU, Philippines — Padayong nanginit si Kevin Durant, ning higayona mikadlit siya og triple-double aron panguohan ang Brooklyn Nets ngadto sa 112-85 nga paglampornas sa New York Knicks sa NBA kagahapon didto sa Barclays Center sa Brooklyn, New York.
Si Durant mipabugahay og 29 puntos uban ang 12 ka rebounds ug 12 sab ka assists alang sa Nets nga miinat sa ilang record ngadto sa 5-7 gawas nga gisugat og daog ang bag-o nilang head coach nga si Jacque Vaughn.
Mao kadto ang ika-12 ka sagunson nga higayon nga si Durant mitali og dili mominus 25 puntos. Si Michael Jordan maoy nagkupot sa record sa pagposte niini og 25 puntos o sobra pa sud sa 16 ka sunod-sunod nga duwa niadtong 1988-1989 season.
Sa laing duwa, nagpadayon ang miserableng season sa Los Angeles Lakers human sila giparotan sa silingan nilang LA Clippers, 114-101.
Nadoble ang kalbaryo sa Lakers gumikan kay nagtakiang si LeBron James nga klarong dunay gihambin nga angol sa nahibiling singko minutos sa katapusang kuwarter.
Si James mitapos uban ang 30 puntos, walo ka rebounds, ug lima ka assists sa Lakers nga nasugamak sa ikasiyam nilang pilde nga giatbangan og duha pa lamang ka daog.
- Latest
