Polog mitaak sa senior B final sa Alegado Cup
CEBU, Philippines — Ang kanhi collegiate star ug beteranong commercial player nga si Randy de la Pisa mipaulbo og 27 puntos sa dihang gikastigo sa Polog ang Garing, 83-51, sa 11th Mayor Teresa "Nene" P. Alegado Fiesta Cup basketball tournament didto sa Consolacion, Cebu.
Sila si Prani Suson ug Paul Dave Branzuela nagkumboya'g 23 puntos alang sa Polog, nga nimartsa ngadto sa final sa Inter-Barangay category B.
Sa category A, ang Tayud mitagak sa Poblacion Oriental, 125-94, luyo sa paningkamot ni Gerald Fernandez nga mipabuhagay og 29 puntos. Si Michael Alinsug mi-iskor og 17 samtang si Arnel Momo miamot og 13 puntos alang sa Tayud.
Sa laing mga dibisyon, gipalagpot sa Pitogo, Pulpogan ug Jugan ang tagsa-tagsa nila ka mga karibal.
Sila si James Ethan Maglasang ug Froilan Maglasang parehong mipupo og 21 puntos samtang si Jhonloyd Pepito midugang og 16 puntos sa dihang gipabwit sa Pitogo ang Jugan, 92-82, sa SK category A.
Si Daniel Mendoza mihipos og 17 puntos ug si Jinxes Salinas dunay 12 puntos sa dihang gipasibat sa Pulpogan ang Poblacion Oriental, 78-72, samtang si Zairyp Pilapi mipabuto og 29 puntos ug si Lee Michael Dahil mi-ayag og 21 puntos aron tabangan ang Jugan nga sayong pabakasyonon ang Lamac, 95-92, sa midget category A.
- Latest
