DMY Events, MEQ Builders naka-iskor sa Arlon Cup
CEBU, Philippines — Ang DMY Events ug MEQ Builders mibugha sa ilang mga kontra sa Hoop Nation Arlon Cup Season 1 niadtong weekend didto sa City Sports Club-Cebu gym.
Si Brant Borces mipabuto og 31 puntos uban ang 10 ka rebounds ug upat ka assists sa dihang gipaksit sa DMY Events ang PJL Hoopers, 79-70, aron pagpabilin sa ikatulong puwesto sa West Division bitbit ang 6-1 win-loss record.
Mirehistro si Pancho Ada og double-double nga 23 puntos ug 10 ka rebounds apan nakawang ang iyang paningkamot gumikan kay ang PJL Hoopers nahagsa ngadto sa ikaunom nilang sagunson nga pilde.
Sa laing aksiyon, si Christian Guinita mi-ayag og 24 puntos, unom ka rebounds ug tulo ka assists sa dihang gilampaso sa MEQ Builders ang 5 Joints, 72-56, alang sa ikaunom nilang daog sud sa siyam ka duwa.
Si Jherjacz Jaca mitagak og 18 puntos ug 14 ka rebounds apan way nahimo gumikan kay ang 5 Joints nadakin-as ngadto sa 3-4.
Sa laing mga duwa, si Kenny Genobia mikolekta og 18 puntos, unom ka rebounds ug tulo ka assists sa dihang ang Prayboys nakaipsot batok sa Gonzalodo Enterprises, 74-72, samtang sila si John Michael Balingit ug William Balagtas mikadlit og 22 puntos matag usa aron tabangan ang Cougars nga maka-eskapo ngadto sa 61-59 nga kadaogan batok sa Trojans Warriors.
Ang Prayboys nagkupot na karon og 6-3 nga baraha samtang ang Cougars miposte sa ikaduha pa lamang nila nga daog sud sa walo ka duwa.
Giorganisa ni Hoop Nation founder ug commissioner Adrian Dy, ang labing unang season sa liga gipaluyohan sa TUF Barbershop I.T. Park, First 5 Sports Lounge & Cafe, Boulevard Water Depot, The Trillium Residences At Molave, Ronex Tolin Photography ug Prism Live.
- Latest
