Casinillo, Abella nanghawod sa Recovery Run
CEBU, Philippines — Sila si Jerome Casinillo ug Lizanne Abella maoy misidlak nga labing hayag sa tanang mga mananaog sa dihang gidominar sa mga sakop sa Spectrum Runners ang RC Goldline Half Marathon Recovery Run 2022 didto sa Cebu Business Park kagahapon.
Si Casinillo maoy naghari sa men’s 21K uban ang personal best time niyang 1:13:47. Ang iyang teammate nga si Florendo Lapiz mitapos sa ikaduhang dapit sa oras nga 1:17:23, samtang ang Kenyan nga si Eric Chipsiror nalanding sa ikatulong puwesto sa oras nga 1:18:40.
Ang mga pambato sa Spectrum miposte sab og 1-2 finish sa women’s 21K luyo sa pagpangu ni Abella nga mirehistro og oras nga 1:41:09 clocking ug gisundan kini sa kauban niyang si Evamie Villarin sa oras nga 1:44:51. Si Josephine Rodriguez ang na-3rd sa oras nga 1:50:20.
Sa men’s 12K, sila si Mark Mahinay (41:36) ug Prince Joey Lee (42:06) sa Spectrum miharos sa nag-unang duha ka puwesto samtang si Kenyan Joseph Mururi ang mipahiluna sa ikatulo sa oras nga 44:38.
Si Asia Paraase, sa Spectrum gihapon, maoy gikoranahang hara sa women’s 12K sa oras nga 51:16. Ang nagsunod nga duha ka puwesto gi-okupar nilang Mariel Estreba (53:19) ug Cherry Andrin (55:14).
Gikumpleto sa Spectrum Runners ang ilang dominasyon sa 6K division pinaagi nilang Jovan Bensig (20:19) ug Rinmarch Gonzaga (20:50) ug Ysabel Baldos (29:47). Sila si Moira Eridiano ug Jessie Abelgos mikuha og atensiyon human manghawod sa 3K sa oras nga 15:15 ug 12:19. Giorganisa sa RC Goldline pinaagi sa presidente niining si Christina Paro-an inabagan sa Philippine Retailers Association-Cebu Chapter ug Metro Cebu Uptown Jaycees, ang labing unang aktuwal nga dagan dinhi sa probinsiya sukad sa pag-ulbo sa kalibutanhong pandemiya kapin sa duha ka tuig na ang milabay gituyo aron abibahan ang pagbangon sa ekonomiya sa Sugbo.
- Latest
