Tatum misalbar sa Celtics; Heat, Bucks, Suns midaog sab

CEBU, Philippines — Si Jayson Tatum mipasud sa iyang buzzer-beating layup aron paghatag sa Boston Celtics og kulbahinam nga daog, 115-114, batok sa Brooklyn Nets sa pasidunang duwa sa ilang NBA Eastern Conference playoff series kagahapon didto sa TD Garden sa Boston, Massachusetts.

Naglabaw unta og tres puntos ang Nets, 114-111, sa hilimatyong segundos sa sikit kaayong duwa apan wala mawad-i og paglaum ang Celtics. Human sila nakasikit ngadto sa usa na lang ka lugas, gikumpleto ni Tatum ang iyang pagkamabayanihon pinaagi sa pagpasud sa iyang basket dayong kapupos sa oras nga maoy nagpalutaw sa Celtics ngadto sa panganod sa himaya.

Si Tatum mipaulbo og 31 puntos uban ang walo ka assists ug duha ka blocks. Nakakuha siya og igong suporta gikan nilang Jaylen Brown, Al Horford ug Marcus Smart nga nagkumbinar og 63 puntos.

Ang kanhi Celtic nga si Kyrie Irving, nga gi-bohan sa Boston fans tibuok duwa, maoy nangu sa pilderong Nets uban ang 39 puntos. Si Kevin Durant mitali og 23 puntos apan hilom kaayo ang uban nilang mga katropa.

Sa laing NBA playoff openers, nagmalamposon sab ang Milwaukee Bucks, Miami Heat, ug Phoenix Suns.

Ang Bucks, nga gipangulohan ni Giannis Antetokounmpo uban ang 27 puntos ug 16 ka rebounds, mitumba sa Chicago Bulls, 93-86, samtang ang Heat midominar sa Atlanta Hawks, 115-91.

Didto sa Phoenix, si Chris Paul mirapido og 19 sa iyang 30 puntos sa second half sa dihang gikastigo sa Suns ang New Orleans Pelicans, 110-99.