Lakers, LeBron hapit na matagak human gilampornas sa Nuggets

CEBU, Philippines — Si Nikola Jokic mipaulbo og 38 puntos uban ang 18 ka rebounds ug unom ka assists sa dihang gipatilaw sa Denver Nuggets ang Los Angeles Lakers sa ikaunom niining sagunson nga pilde, 129-118, sa NBA kagahapon didto sa Crypto.com Arena sa California.

Tungod sa ilang kapildihan, si LeBron James ug ang Lakers nanginahanglan og usa ka dakong milagro aron ilang malabyan ang San Antonio Spurs alang sa luna sa play-in tournament. Ang Lakers anaa karon sa ika-11 nga dapit sa Western Conference bitbit ang 31-47  record samtang ang Spurs nagbarog sa ika-10 nga puwesto uban ang 32-45 nga baraha.

Upat na lang ka duwa ang nahibilin sa Lakers ug kininahanglan nga dili na sila mapukan pa, usa ka malisud nga tahas ilabi na kay ang ilang sangkaon sunod mao man ang nagharing Phoenix Suns karong Miyerkules.

Kon ugaling mahagba sila sa mga kamot sa Suns didto sa Arizona,  hayan nga mapapha na sa hingpit ang nipis kaayong tsansa sa Lakers nga makasud sa NBA playoffs.   

Kon kini mahitabo, ikaupat pa lamang kini nga higayon nga si James dili makatikang sa playoffs sukad siya nisud sa NBA niadtong 2003. Sa laing aksiyon, giwani ni Luka Doncic si Giannis Antetokounmpo sa dihang gipayaka sa Dallas Mavericks ang Milwaukee Bucks, 118-112.

Si Doncic mitimbre og 32 puntos, 15 ka assists ug walo ka rebounds alang sa Mavs, nga nagpabilin sa ikaupat nga dapit sa West bitbit ang 49-30 nga marka.

Samtang ang Bucks nadakin-as ngadto sa 48-30 bisan og nakapugnit og 28 puntos gikan ni Antetokounmpo.

Didto sa Boston, si gipakaging sa Celtics ang Washington Wizards, 144-102.

Sila si Jaylen Brown ug Jayson Tatum nagkumboya og 54 puntos alang sa Celtics nga ikaduha gihapon sa Eastern Conference.