ARQ Lapu-Lapu City chiefs mopas-an duha ka misyon

CEBU, Philippines — Duha ka misyon ang pas-anon sa ARQ Builders Lapu-Lapu City Chiefs sa labing unang season sa Pilipinas Super League (PSL).

Unang tahas nga sagubangon sa Chiefs mao ang pro division sa PSL nga gikatakdang mosikad karong adlawa, Marso 18, didto sa Dipolog City Gymnasium sa Zamboanga del Norte.

Ubos sa pagtimon ni coach JC Catadman ug hugtanong suporta ni team owner Jason Arquisola, ang Chiefs pagabidahan sa pipila ka mga kanhi bitoon sa Cebu collegiate basketball sama nilang Rino Berame, Rendell Senining, Dyll Roncal, Franz Arong, ug Mannie Gabas.

Nagkumpleto sa lineup sa Lapu-Lapu sa labing bag-ong propesyonal nga liga sa nasud mao sila si Anchor Igot, Djoene Torres, JR Saga, Vincent Minguito, Niño Caballero, Gin Mejares, Norris Dave Arana, Allan James Martin, Sethe Arnulf Malazarte, ug Medjet De la Rama.

Ang Chiefs moabli sa ilang kampanya batok sa Cagayan de Oro Higalas karong Dominggo, Marso 20.

Sa laing bahin, ang mga Oponganon ballers mag-atubang og lahi nga hagit sa Under 21 Aspirants Division sa Super League nga sugdan karong Abril 1 sa Roxas municipal gym didto gihapon sa Zamboanga del Norte.

Gipangulohan ni coach Roger Liston-Bergado, ang ARQ Lapu-Lapu U21 squad gilangkoban nilang Jeco Bancale, Mitch Almodal, Johndel Bagaporo, Jade Mata, Reinhard Jumamoy, Jose Zaldy Dizon, Paul Llenes, Yuan Ochea, Jeremi Vidal, Dave Paulo, Sam Melicor, Al Odias, Frank Gabunada,  Simon Ducusin, Nelson Duallo, Vince Sestoso, Joshua Ompad, Cid Jumao-as, Brian Santillan, ug James Lapasa.