Suns, Hawks mi-rally aron inaton nagkadenang daog

CEBU, Philippines — Padayong nanginit ang Phoenix Suns ug Atlanta Hawks hinungdan nga giinat ang nagkadena nilang daog sa NBA kagahapong adlawa.

Gipapas sa Suns ang 12 puntos nilang alkansi sa ikatulong kuwarter aron patikangkangon ang San San Antonio Spurs, 115-110, alang sa ika-10 nilang sagunson nga daog.

Si Devin Booker mikadlit og 28 puntos alang sa Suns nga maoy labing unang team nga miposte og 40 ka daog ning NBA season.

Wala sab magpabitin si Mikal Bridges nga dunay 26 puntos ug ingon man si Chris Paul nga mipupo og 20 puntos ug 19 ka assists alang sa Suns. Sila si Doug McDermott ug Lonnie Walker IV nagkumboya og 46 puntos sa pilderong Spurs.

Didto sa Atlanta, si Trae Young mipabuhagay og 36 puntos ug mipasa og 12 ka assists sa dihang gidagit sa Hawks ang Los Angeles Lakers, 129-121, aron inaton ang mainit nilang pagratsada ngadto sa pito ka duwa.

Ang Hawks nabiyaan og 10 puntos human sa tulo ka kuwarter apan sila si Young ug Onyeka Okongwu nagkumbinar og 25 puntos sa pinal nga 12 minutos sa aksiyon aton tabangan ang ilang koponan nga pahubason ang Lakers. Ang Hawks nagbitbit na karon og 24-25 record samtang ang Lakers natagak ngadto sa 24-27.   

Si Lakers superstar LeBron James wala makaduwa sa ikatulong sunod-sunod nga higayon kay nayayay ang walang tuhod.

Si Malik Monk maoy nangu sa Lakers uban ang 33 puntos ug 10 ka rebounds. Si Anthony Davis mihipos og 27 puntos samntang si Russell Westbrook mitimbre og 20 puntos ug 12 ka assists sa pilderong kawsa.